<士氣低落>
護士呢份工辛苦既地方, 最近因為怨氣愈嚟愈多, 都已經有好多人一一列舉過, 呢度就不作詳細描述啦。
雖然我只係jun過super junior既fresh grad, 但係呢唔夠4個月入面, 已經感受到係公立醫院番工, 有時真係可以令人好氣餒。
病人排隊做冇咁緊急既手術, fast(禁食)足三日, 都未排到佢。雖然話就話有條糖水鹽水俾佢吊住, 但太耐唔食野, 難免會覺得辛苦。所以病人要求DAMA(discharge against medical advice, 指強行出院), 但由醫生解釋過強行出院既風險之後, 病人決定留低。
病人家屬因而走出黎向我呢位街主抱怨: “你地作為前線醫護人員, 一定有數據會知道要等幾耐先有得做!” “點解唔一早講要等咁耐! 早d講我地就去私院!” “呢d事一定唔係第一次發生, 點解你地唔反映下?!”
抱歉, 因為如果有人情況比你緊急又要做手術, 就會出現插隊情況。
抱歉, 我地冇辦法俾任何數據, 因為我地真係唔會知咩時候會有比你危急既病人出現。
抱歉, 我作為一個前線醫護人員, 只係龐大醫管局機構入面既一粒塵, 正如你所講, 問題一向存在, 歸根究底都係因為人手不足。
我反映, 又可以改變到d咩？
我花左15分鐘去安撫呢位冇打算停止抱怨既家屬, 終於因爲佢電話響, 我地終結左對話, 然後我番番去繼續寫我未寫完既十幾塊牌板。最後病人等左5日先排到佢做手術。
除了無奈, 還是無奈。
更無奈既係, 曾經向身邊非同行既朋友呻, 番工訓無定時, 每日例行OT冇得補鐘冇得補錢, 忙到坐又冇得坐尿又冇得屙, 換黎朋友既一句:
“你人工咁高!”
呢句說話, 老實講, 仲難聽過粗口。
知道內情既, 會知道其實如果以工作量計算, HA既護士真係underpaid。同大眾好鐘意話我地”人工高”一樣, 當下聽到呢句說話, 只係令到我覺得我地既情況不被理解。再者唔好忘記, 仲有好多好多EN(登記護士), 同RN(註冊護士)做一樣份量既工作, 人工卻更加低。
最後我想講, 如果有護士朋友同你呻番工辛苦, 記得千祈唔好話佢人工高。默默聽佢呻下, 佢就已經好感激你。
#向全港公立醫院醫護人員致敬
Search